Saturday, November 22, 2008

အကြိုက်ဆုံးကာတွန်းကား

မတူးတူးသာ က Tag ထားတယ် အကြိုက်ဆုံးကာတွန်းကားတဲ့ ..ခက်ပြီ တော်တော်များများက အကြိုက်ဆုံးဖြစ် နေတော့ ရွေးရခက်နေတယ်။

ကာတွန်းကားတွေ ကြည့်ရတာ ပျော်ဖို့ကောင်းတယ် ကာတွန်းဇာတ်ကောင်လေးတွေ မှာ ကိုယ်ပိုင်ဇာတ်ကောင် စရိုက်တွေရှိတယ်လေ။ ကျမကတော့ အဲဒီ ဇာတ်ကောင်စရိုက်လေးတွေကိုစိတ်ဝင်စားတာရော ကာတွန်းပုံလေး တွေကိုကြိုက်နှစ်သက်တာရောနဲ့ ကာတွန်းကားဆို မလွတ်တမ်းကြည့်လေ့ရှိပါတယ်။

အရင်ကတော့ ကာတွန်း ရုပ်ရှင် ဆိုတာ ကလေးများ အတွက်ဖျော်ဖြေရေးအဖြစ် ရည်ရွယ်ပြီးထုတ်လုပ်ခဲ့ပေမဲ့ ယနေ့ခတ်မှာ လူကြီးလူငယ်မရွေး ကြိုက်နှစ်သက်ကြပါတယ်။ ကွန်ဖူးပင်ဒါ (Kung Fu Panda) ကာတွန်းရုပ်ရှင် ဟာ Box Office မှတ်တမ်းမှာ စံချိန်ချိုးခဲ့ပါတယ်။ ဒီကားဟာ တရုပ်ပြည်မကြီးတခု တည်းမှာ ယွန်ငွေ သန်း ၁၀၀ အမြတ်ထွက်ခဲ့ပါတယ်။ ကျန်တဲ့ နိုင်ငံတွေ ကရတဲ့ အမြတ်ငွေ မပါသေးပါဘူး။

အကြိုက်ဆုံးတွေထဲမှာ အမြဲ မှတ်မှတ်ရရရှိတာကတော့ ရေသူမလေး(The Little Mermaid) ပါ။ ဒီကာတွန်း ရုပ်ရှင်လေးကို ထပ်ပြန်တလဲလဲ ကြည့်မိတဲ့ အကြောင်းအရင်းကတော့ ဇာတ်လမ်းလေးကို ကြိုက်တာအပြင် ဇာတ်ကားထဲမှာပါတဲ့ သီချင်းများကိုလည်း ကြိုက်နှစ်သက်မိလို့ပါ။ ရေသူမလေး ဇာတ်လမ်း မူကွဲတွေ နောက်ထပ်ထွက်ရှိလာပါသေးတယ် ဒါပေမဲ့ ကျမကြိုက်နှစ်သက်မိတာက ၁၉၈၉ ခုနှစ် မှာ ပထမဆုံး ရိုက်ကူးထုတ်လုပ်ခဲ့တဲ့ ကာတွန်းရုပ်ရှင်ပါ။

ဇာတ်လမ်းလေး ကို အကျဉ်းချုပ်ပြောပြရရင်တော့ ရေအောက်ကမ္ဘာကိုအုပ်စိုးတဲ့ ဘုရင်ကြီး (King Triton - Merman ရေသူထီးပေါ့) အဲဒီဘုရင်ကြီးမှာ သမီးတော် ၇ ယောက်အနက် သမီးအငယ်ဆုံး မင်းသမီးလေး ရေသူမလေး အာရီရယ် (Ariel) ဟာ လူသားတွေကို စိတ်ဝင်စားပြီး လူသားတွေရဲ့ကမ္ဘာကို သွားရောက် စူးစမ်းလိုစိတ်ရှိတယ်။ သူမ မှာ အလွန် သာယာတဲ့ အသံလည်းရှိတယ်တဲ့။

တနေ့တော့ သူမရဲ့ အဖေါ်ငါးကလေး ဖလောင်ဒါ (Flounder) ဟာ ရေပြင်ထက်ကိုသွားရင်း ပင်လယ်ကူး သင်္ဘောနဲ့ ခရီးထွက်လာတဲ့ မင်းသားလေး အဲရစ် (Eric) ကို ရေသူမလေး အာရီရယ်က မြင်မြင်ခြင်း ချစ်မိသွားရောတဲ့။ လေပြင်းမုန်တိုင်းတွေ ကျလို့ သင်္ဘောမှောက်တော့ မင်းသားလေး အသက်ကို သူမက ကယ်ပေးခဲ့တယ်။

နောက်တော့ လူသားရဲ့ အသက်ကိုကယ်တာ ရေအောက်ဥပဒေကိုချိုးဖေါက်တယ်ဆိုပြီး ဖခင်ဘုရင်ကြီးက စိတ်ဆိုးပြီး သူမရှာဖွေစုဆောင်းထားတဲ့ လူသားတွေရဲ့ပစ္စည်းတွေကိုဖျက်ဆီးပစ်လိုက်တယ်။ သူမကို မလိုလားတဲ့ ပင်လယ်စုန်းမကြီး အာစူလာ (Ursula) က ရေသူမလေးကို လူအသွင်ဖန်ဆင်းပေးမယ်တဲ့ ဒါပေမဲ့ သူမရဲ့ အသံကိုတော့ အလဲအလှယ်လုပ် တဲ့အနေနဲ့ စုန်းမကြီးကိုပေးခဲ့ရတယ်။ ဒါပေမဲ့ သူမဟာ ၃ရက်အတွင်းမှာ မင်းသားလေးရဲ့ အချစ်စစ်နဲ့နမ်းတဲ့ အနမ်းကိုရခဲ့မယ်ဆိုရင် ရေသူမလေး ဟာ လူသားသွင်နဲ့ အမြဲနေသွားနိုင်ပြီး စကားလည်းပြန်ပြောနိုင်မယ်တဲ့။

စုန်းမကြီးဟာ မင်းသားလေးက ရေသူမလေးကို မေတ္တာသက်ဝင်မသွားအောင် နည်းမျိုးမျိုးသုံးပြီးတော့ အကောက်ကြံတော့တယ်။ နောက်ဆုံးမှာတော့ စုန်းမကြီးလည်းသေ၊ မင်းသားလေးဆီကလည်း မေတ္တာစစ်နဲ့ အနမ်းတပွင့်ကိုရပြီးတော့ ရေသူမလေးလည်း မင်းသားလေးနဲ့ သက်ဆုံး တိုင်ပျော်ရွှင်စွာနေ ထိုင်သွားရောတဲ့။

ဒီကားထဲမှာ ထူးထူးခြားခြားပြောချင်တဲ့ ဇာတ်ကောင်စရိုက်ကတော့ ပင်လယ်ဂဏန်းကြီး (Sebastian the Crab) ပါ သူက ဘုရင်ကြီးရဲ့ လူယုံတော်တဦးလည်းဖြစ်တဲ့အပြင် ရေသူမလေးရဲ့ အထိမ်းတော်ကြီးလည်း ဖြစ်တယ် ။ ရေသူမလေးကိုလည်း ထိမ်းလို့မရ ဘုရင်ကြီးကိုလည်းကြောက်ရနဲ့ နှစ်ယောက်ကြားဗျာများ တဲ့ ဇာတ်ကောင် စရိုက်ဖြစ်ပါတယ်။ သူဟာ ဇာတ်အစအဆုံး အရေးပါတဲ့နေရာကနေ သရုပ်ဆောင်သွားတယ်။

ကာတွန်းရုပ်ရှင်တွေ အတော်များများမှာ ဇာတ်ဝင်တေးသီချင်းတွေကို အသားပေးထည့်သွင်း ရိုက်ကူးလေ့ရှိတယ်။ အော်စကာဆု၊ ဂရမ်မီဆု၊ ရွှေကမ္ဘာလုံးဆု စတဲ့ဆုတွေ ဆွတ်ခူးခဲ့တဲ့ ကာတွန်းရုပ်ရှင် တွေလည်းရှိပါတယ်။

ဒီရေသူမလေး ကာတွန်းရုပ်ရှင်ဟာလည်း အော်စကာဆု ၂ဆု၊ ရွှေကမ္ဘာလုံးဆု ၂ဆု၊ ဂရမ်မီဆု ၁ ဆု နဲ့ တခြား ဆုရွေးချယ်ရေး အဖွဲ့တွေကပေးတဲ့ ၅ဆု ကိုလည်း ထပ်မံရရှိခဲ့ပါတယ်။ ရရှိတဲ့ဆုအများဆုကတော့ အကောင်းဆုံး တေးဂီတ နဲ့ အကောင်းဆုံး ဇာတ်ဝင်တေးဆု တွေဖြစ်ပါတယ်။

ဆုရရှိတဲ့ ဇာတ်ဝင်တေး “ရေအောက်ကမ္ဘာ” (Under the Sea) သီချင်း ကတော့ ကျမရဲ့အကြိုက်ဆုံးပါ။ ရုပ်ရှင်ထဲမှာ ပင်လယ်ဂဏန်းကြီး (Sebastian) က ဒီသီချင်းကိုသီဆိုထားပါတယ်။ လူသားကမ္ဘာကို စိတ်မဝင်စားပါနဲ့ ဇာတိဖြစ်တဲ့ ပင်လယ်ရေအောက်ဟာ မင်းအတွက် အကောင်းဆုံးနေရာ၊ အေးချမ်းဆုံး ဒေသပါ လို့ ရေသူမလေး ကို လူသားတွေရဲ့ဌာနေကို မသွားဖို့ ဆုံးမတားမြစ် တဲ့ သီချင်းလေးပါ။ ပင်လယ်ဂဏန်းကြီး နေရာကတော့ ဆန်မြူရယ် ရိုက် (Samuel E. Wright) က အသံဖြင့်သရုပ်ဆောင် သီဆိုထားပါတယ်။ သူ့ရဲ့ အသံဝါကြီးဟာ အတော်နှစ်လိုဖွယ်ကောင်းအောင် ဒီသီချင်းလေးနဲ့ လိုက်ဖက်လွန်းလှပါတယ်။ “Under da Sea… Under…da .. Sea.. he… he…”

သီချင်းလေးက နားထောင် ကောင်းရုံတင်မကသေးပါဘူး ကာတွန်းရုပ်ရှင်တွေရဲ့ ထုံးစံ အတိုင်း ရေအောက်မှာ နေထိုင်တဲ့ သတ္တဝါလေးတွေကိုပါ တီးမှုတ်ကခုန်ခိုင်းထားတော့ ကြည့်ရတာ အတော်လေး စိတ်ကိုရွှင်လန်းစေ ပါတယ်။ မယုံရင် Youtube မှာတင်ထားတဲ့ သီချင်းလေးကို နားထောင်ကြည့်နိုင်ပါတယ်။ ဒီမှာကြည့်ပါ။

ဒီသီချင်းလေးကို ဟာဝှက်တ် အက်ရှမန် (Howard Ashman) က စာသားရေးပေးပြီး အဲလန် မန်းကန် (Alan Menken) က တေးဂီတဖန်တီးထားပါတယ်။ သူတို့နှစ်ဦးဟာ ဒီသီချင်းနဲ့ ဂရမ်မီဆုကို ၁၉၉၁ ခုနှစ်မှာ ဆွတ်ခူး ခဲ့ပါတယ်။

ကျမကတော့ ကာတွန်းတွေကိုလည်းကြိုက် ကာတွန်းကားတွေကိုလည်း နှစ်ချိုက်လွန်းသူမို့ ကာတွန်း DVD တွေကို စုဆောင်းချင်ပေမဲ့ အသက်ကြောင့် ဝယ်စုရမှာ နည်းနည်းရှက်သလိုဖြစ်တာနဲ့ အရင်က မစုဖြစ်ခဲ့ဘူး။ အခုတော့ သမီးလေး ကာတွန်းကြည့်တတ်တဲ့ အရွယ်ရောက်ရင် သမီးလေးကို အကြောင်းပြု ပြီး ကာတွန်းကားတွေဝယ်စု ဖြစ်တော့မယ်ထင်ပါရဲ့။

(TAG ယဉ်ကျေးမှုကိုသေချာနားမလည်သေးတော့ ဆက် TAG ရမှာကို မေ့ပြီး အပြင်သွားလိုက်တယ်။ လမ်းကျမှ .. ငါ ဘယ့်သူ့ကိုမှ ဆက်မ TAG မိပါလားလို့ ပြန်စဉ်းစားမိပြီး... ခု TAG တော့မယ်ဗျို့... ကာတွန်းပို့စ်လေးတွေတင်လေ့ ရှိတဲ့ ကိုဇာနည်ဝင်း၊ ကာတွန်းကြည့်မကြည့် မသိပေမဲ့ TAG ချင်လို့ကို TAG မဲ့ ကိုအောင်(ပျူနိုင်ငံ) နဲ့ comment လာရေးသွားတဲ့ ကိုလူလ တို့ကို လက်ဆင့်ကမ်း TAG လိုက်ချင်ပါတယ်။)

4 comments:

လူလ said...

မင်္ဂလာပါ မယော

လာရောက် ဖတ်ရှု့သွား၏
ကျွန်နော်ကြိုက်တဲ့ ကာတွန်းက The Simpsons ပဲ၊


ရွှင်လန်းချမ်းမြေ့ပါစေ...

ပျူနိုင်ငံ said...

ရေးတော့ ရေးပါ့မယ် အမ။ ဒါပေမဲ့ ကာတွန်းရုပ်ရှင်
တစ်ခုကို သေသေချာချာရေးဖို့ ကျနော်အခက်တွေ့
နေလို့ ငယ်ငယ်က ဖတ်ခဲ့ဖူးတဲ့ ကာတွန်း စာအုပ်
တစ်အုပ်အကြောင်း ရေးပါ့မယ်။ ဖြေးဖြေးပေါ့။ အမ
ရေးထားတာက ရှယ်ဘဲဗျာ အရမ်းကောင်းတယ်။

tututha said...

ကျေးဇူးအရမ်းတင်ပါတယ် ငှက်ကလေးရေ (စင်ယော်ဆိုတော့ ငှက်ကလေးပေါ့နော်) tag ရကျိုး တကယ်နပ်ပါတယ်။ ကာတွန်းကားတွေစုဖို့ မရှက်ပါနဲ့ တော်ကြာကိုယ်လိုချင်တဲ့အချိန်မှာ လိုချင်တဲ့ကား မရမှာစိုးလို့ပါ။ ခုတောင်ကျမ ပိုကာဟွန်းတက်စ်ကို ပြန်ရှာတာ ရှာမတွေ့တော့ဘူးလေ။

pandora said...

ကာတွန်းကား လာကြည့်သွားတယ် :)